鄭衍峰急撲髮型屋王麗嘉專人上門變Look

踏入春天，「潮流達人」王麗嘉轉玩新造型，但她等不及髮型屋重開，已急召髮型師上門「變髮」；至於無綫藝人鄭衍峰與焦浩軒，亦第一時間到髮型屋報到！

全港髮型屋停業2星期後獲准於昨日重開，但藝人王敏德與名模馬詩慧的愛女王麗嘉按捺不住，只差一天都等不及，寧願搵御用髮型師上門為她剪去「煩惱絲」。她將一把長長金髮剪走，變成Cool爆短髮Look，為襯番新髮型，她連衣着亦悉心作出不同配搭，放狗時戴Cap帽襯衞衣，跟朋友食飯則換上Oversize西裝，密冚34D美好身段，難免令大班宅男失望。

至於無綫主持鄭衍峰及《愛．回家之開心速遞》中「島大3子」之一的焦浩軒，昨日第一時間飛撲去髮型屋，更不約而同在社交網晒相，戴住口罩仍難掩興奮之情，當中鄭衍峰豎起手指公恭喜髮型師「開爐」，留言：「是日必做的一件事。」而焦浩軒亦雀躍說：「好嘢！開番喇！我個頭終於可以見番人。」

謝嘉怡為老竇操刀

早前傳確診的前港姐謝嘉怡則化身髮型師，上載為爸爸剪髮的短片，雖沒透露病情，但見她表現精靈，相信已經康復。原來她13、14歲已到Auntie的髮型屋學剪髮，希望將來可以一齊開髮型屋，她笑說：「如果我喺TVB之後冇嘢拍，我咪剪頭髮！」