自稱導演氹落疊 曹永廉智破電騙保住50萬：佢侮辱我智慧

網絡騙案頻生，電話騙案更是層出不窮，藝人曹永廉昨日收到一名自稱是行內李姓電影導演的短訊，對方先聯絡其太太姜依蘭，聲稱經她的父親姜大偉取得聯絡電話，之後就與阿廉展開短訊對話。

期間，這位「李導演」表示有電影邀阿廉演「男二」，預計6月開工，下月底開始進行試鏡，聲稱同片演員還有谷德昭、黃一飛等。騙徒講到似層層，但說到最後突然「出招」，訛稱「孟達」的親人有腎病，急需錢治療，向阿廉表示「肥谷」已轉帳100萬，但礙於有上限，只能轉到50萬，故問阿廉可否代為轉帳50萬給醫生。向來話頭醒尾的阿廉此時已洞悉一切，更笑說：「我覺得佢侮辱緊我智慧！」他指騙徒跟他傳短訊的手機號碼並非真正「李導演」的電話，雖然對方能講出真正的手機號碼，並以「真號碼」來電，但就沒有聲音，之後對方辯稱其他人有同樣情況，故繼續以短訊與阿廉對話。

曹永廉坦言首次遇到這些騙徒，接受本報訪問時說：「其實一開頭傾都覺得有啲唔對路，我都係同佢閒話幾句，佢又同我傾檔期。之後我開始懷疑佢，係因為我有用語音同佢對話，但佢都只用文字回覆，之後間唔中又傳兩條『李導演』把聲嘅語音，但就似係Cut出嚟，所以我都諗住同佢傾多兩句就唔理，點知佢仲叫我過50萬畀佢！我即刻知係假，之後都搵到真正嘅李導演，打畀佢時，佢都話有好多人冒認佢。」