肉搏楊茜堯 勢創高收視 張智霖乘勝追擊 延「族」氣勢

《家》劇繼早前於內地上架後點擊「豐收」，近日於無綫翡翠台播出，同樣錄得佳績，上周收視達25.6點，拍得住高收處境劇《愛．回家之開心速遞》的27點及《東張西望》的27.6點，台前幕後可謂飲得杯落。日前播出一集，楊茜堯利用關鍵性視頻為自己洗白，將家族關係搞到滿城風雨，獲網民激讚「半分鐘多次變臉」。

下周結局篇，張智霖（Chilam）依然情傾「黑化」的楊茜堯，2人多次於遊艇密會，場面火辣！他自知報錯仇，但仍被楊茜堯的虛情假意一再動搖，直至最後依然對坐監的女方不離不棄，他對感情執着，令不少觀眾動容。談到收視創佳績，他開心說：「梗係覺得鼓舞，希望團隊日後製作更加多好嘅劇集。當下大家都咁緊張，但我哋都算提供放鬆時間畀觀眾朋友。」

據知，總監製梁家樹得知劇集大受歡迎，近日加速準備劇本，希望盡快以原有班底拍攝另一齣同樣以家族為題材的劇集，Chilam表示：「今次真係合作得好開心，如果檔期配合，我梗係願意再接拍啦！」楊茜堯與老公羅子溢亦大表興奮，子溢表示﹕「今次劇情同老婆嘅關係對立，希望下次合作可以變成戰友，唔使成日鬧交就好喇。（你肯再放人？）冇問題，最緊要劇本吸引，老婆又想演啫。」另外，郭政鴻日前受訪時大爆拍攝趣事：「有場戲陳曼娜想怒罵熊黛林，但竟然衝口而出講錯，將『葉彩薇』講成『葉子楣』，全場爆笑！」