事業起飛 恨做女一 關嘉敏冇覺好瞓：拍劇唔好拍拖

女子組合Bingo成員關嘉敏（Carman）自去年簽約邵氏後，演出機會不斷，除了參加大騷、拳賽及跳舞比賽《盛．舞者》外，更夥拍陳展鵬、劉佩玥、陳豪、胡定欣及黃宗澤等拍劇。雖然多演反派角色，但日前她受訪時卻大叫過癮：「一齣演殺手，要一個打十個人，另一齣都要打交，但我好有興趣，終於可以打人，唔使被人打。拍動作戲好開心，Training堂師傅讚我啲武打動作幾好，加咗我戲份。」她曾客串《愛．回家之開心速遞》和「龍璟風」陳浚霆做對手戲，雖然戲份不多，但外界反應好：「有啲朋友都讚我，喺演戲方面都算有少少獲肯定。」

加入電視圈後，她發現有很多不足之處，已上演藝班將勤補拙：「我記得拍第一齣劇，嗰場戲要喊，但我又唔識睇機位，點知拍嗰時耷低咗個頭要重新拍過，導演、監製戥我嘥咗啲眼淚，好在我好多眼淚啫。」現時連拍兩劇的她，終於明白當初經理人提醒她拍劇勿拍拖的道理：「要捱一個月通宵，加上我又要返演藝堂，根本連瞓覺嘅時間都冇，如果有拍拖，我咁忙，真係好易散。（怕捱眼瞓？）我好捱得，讀書時因為半工讀，試過成個禮拜瞓得2、3個鐘。」

拍了3齣重頭劇的她已適應開工節奏外，亦得到不少友誼，她坦言交心的以男演員居多：「陳俊堅、鄭衍峰、麥秋成、王祖藍表弟『孖八』李俊華同吳家樂都Friend咗，不過女演員就少啲，可能我同電視台啲女仔好唔同，我係好Man，好想照顧啲女仔。」問到是否朝女一之路奮鬥？她直言：「當然想。」