被拖欠6位數酬勞 姚子羚停工食老本

姚子羚昨日戴上2個口罩出席活動，小心為上！她自嘲神經過敏：「以為自己發燒，就攞個探熱計出嚟，但根本體溫正常！依家都唔敢放狗，成個禮拜冇同佢出街，訓練佢喺屋企去洗手間。」談及好友胡定欣染疫，她說：「我有慰問佢，佢話夠嘢食唔使幫手，父母照顧得佢好好，飲中藥調理，已經好番好多。（好多朋友中招？）都多，不過係圈外人。」

她坦然因疫情嚴峻，不少工作取消或押後：「都話唔到畀你聽幾時復工。（少咗好多收入？）好彩有啲積蓄。（有冇好似陳展鵬咁收唔番啲酬勞？）都有，情形同佢類似，不過冇佢牽涉咁多錢，我就大約6位數。（咩工作嚟？）保健產品，希望用和平方法解決。」又透露有朋友向她借錢：「我同佢唔係太熟，佢都搵到我嘅話，應該係冇辦法喇！但大家各有難處，所以我婉拒咗。（好熟嘅話會借？）我諗會。」

至於胡定欣亮相陳敏之的網上節目，談到感情生活，她覺得自己太理性，會成為發展感情的阻礙：「不過相信嗰個人出現，我就唔會咁（理智）㗎喇！」她自爆遭鄭嘉穎催婚，又坦言比起再奪視后，更渴望找到真命天子：「我唔需要諗，呢條唔係一條問題。」

談到不輕易相信別人，敏之問她：「你受咗咩傷害呀？畀人呃過？」定欣當堂Dead Air，然後感嘆：「冇話呃唔呃，感情係雙方面嘅，都40歲人啦！總有感情上嘅經歷。」又直言要找到Mr. Right結婚並不容易：「你喜歡一個人，跟住同佢點走嗰條路係兩樣嘢。」