職場求存 唱盡是非 曾樂彤橋唔怕舊與楊丞琳一決高下

英皇歌手曾樂彤推出今年第一首新歌《一決高下》，以輕快曲風唱盡辦公室政治，日前她接受專訪時，表示在職場求存都是一門大學問：「一定會遇見好多人，有人就有八卦同是非，有時聽完好激氣，但仲要扮到若無其事咁，所以我覺得要學識調整自己，執着去澄清，只會為啲八卦友提供更多材料。我希望呢首歌，可以畀啲『打工仔』聽住返或放工，幫到佢哋調節吓心情。」

現年27歲的曾樂彤，未當歌手及網紅前，曾擔任時薪40多元的服裝連鎖店倉務員，她說：「我打工唔係為錢，係想吸取吓社會經驗，學吓點同啲同事、客人相處，不過半年後就冇做，因為我入大學，呢份工算係我唯一一份返工時間咁穩定嘅工。」

至於其新歌跟楊丞琳的舊歌《現代之形象》相似，她坦承：「同楊丞琳嗰首都係講辦公室啲是非嘢，我都覺得好似，不過只係題材一樣，其實完全唔同，所以唔怕被誤會。（楊丞琳引發咗創作呢首歌？）絕對係，呢個係廣東話版。」她又覺得正如情歌，內容不是失戀就是甜蜜，因此不構成抄襲成分，更透露因疫情而減少外出，有更多時間創作，結果《一》曲除有辦公室版本外，還有愛情、友情版，最後唱片公司就揀中辦公室版。

除忙音樂創作外，她最期待疫情盡快減退，因原定今年上映的兩齣電影，受戲院關閉影響而延期：「好想快啲有戲上，咁我首電影歌都可以面世。」