昔日東方卸下武「妝」 放心做自己 Anson Lo揭陰暗面 內心有隻怪獸
Anson Lo向來對儀容非常着緊，以前會介意素顏及鬚根照被批評，但近年心態轉變，現在落街絕不化妝，完全將「偶包」放下，做真實的自己。
男團MIRROR「教主」Anson Lo近日忙於宣傳跳唱快歌《Mr. Stranger》，新歌玩暗黑風格，與上一首《Megahit》截然不同。他自認個性「好煩」，堅持每次出歌都要有不同概念：「上次派對啲、開心啲，今次玩另類風格，講番上年自己嘅內心感受。11月嗰陣壓力爆煲，自己同內心掙扎，腦裏面好似有把聲音，好驚達唔到人哋嘅要求，又驚大家接受唔到我轉變，所以怕試新嘢。」
MV中他破格地以吸血鬼造型示人，原來他有日忽發奇想，覺得每隻吸血鬼都好怕被揭穿身份，故用此作暗喻：「Mr. Stranger就係講我好擔心被揭發真實嘅黑暗面，其實黑暗面唔係乜嘢滔天大罪，每個人都有，係好少畀人見到嘅一面，好似好少見我懶洋洋、好頹廢、冇精神、不修邊幅嘅一面。」
曾介意素顏被彈
入行初期，他落街絕不踢拖，又會準備好買早餐的出街衫：「1年前甫過張素顏有鬚根相，跟住有好多Comment叫唔好咁做，依家想做最真實嘅自己，唔再介意。（依家落街唔化妝？）絕對唔化妝，唔使開工或者開會都唔化，想畀皮膚休息吓。」但又忍不住笑問：「唔知大家鍾唔鍾意呢個我呢？」
《Megahit》獲得「叱咤十大」第9位，成績不俗，對於新歌能否承接氣勢，他不敢去想，只感覺興奮：「出《Megahit》時係自己最鍾意嘅歌，點知原來《Mr. Stranger》先係最鍾意嘅跳唱歌！」他刻意用沙啞的唱腔演繹，MV中的眼神也像憤怒的怪獸，問內心是否有「怪獸」一面？他笑說：「怪獸念頭就冇，但內心藏着一隻好鍾意跳舞嘅怪獸，哈哈！我好少發嬲，對屋企人都好溫馴，好似小動物咁。」最近隊友Jer、Jeremy及Ian先後出歌，MV不約而同帶點怪異味道，Anson Lo覺得大家風格不同：「MIRROR通常隔幾日就有人出歌，一定唔會一樣，我哋有無形嘅默契。」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
