Gordon洗衣店一腳踢三文治醫肚

演藝圈受第5波疫情重創下，有藝人要北上搵機會，或轉行另謀出路，有讀者爆料指參演無綫劇《法言人》的前天堂鳥成員Gordon在油麻地某洗衣店任職，一個人接柯打、執衫，忙到無暇出外午膳，要食三文治醫肚。

昨日他受訪時坦言受疫情影響，一年前和友人合資6位數的荔枝角外賣食店已結業：「之前間食店一日都有成5千蚊生意，但之後疫情愈嚟愈嚴峻，嗰區多咗人在家工作，試過生意得千幾蚊，真係得個做字。」至於教跳舞亦受防疫政策及忙拍劇而暫停，不過在洗衣店只屬幫手性質：「間洗衣店係我阿爸、阿媽嘅，佢哋經營咗20幾年，做到可以買咗嗰個地舖，嗰日唔使開劇咪嚟幫阿媽手，都有好多明星客。」

計劃推手機遊戲

雖然市道不佳，但他充滿正能量，現籌備推出手機遊戲，更是無本生利：「我唔使出錢，只係諗橋。」又自爆在無綫已拍了3齣劇，最開心可以與袁偉豪、王敏奕、楊柳青成好朋友：「為咗紀念喺《法證先鋒V》同Team飾演重案組，我印咗啲Team衫送畀佢哋。」