李璨琛拍劇唔敢搵阿女客串 林明禎為錢做「飛人」捱12次隔離

李璨琛、林明禎、ERROR副隊長何啟華（Dee）及姜文杰等演出的電視劇《心靈師》前晚在堅尼地城開工， 林明禎挑戰憂鬱症病人角色：「拍咗4日，拍多日就去台灣工作，要接受『14+7』隔離，之後返香港再隔離14日，加埋呢2次就隔離咗12次，可以出書教人，不過冇辦法，為咗做嘢賺錢。」李璨琛笑說：「我以為隔離4次已經好多，佢贏咗我！」

身兼監製的李璨琛表示，新劇會拍到3月底，第5波疫情下也擔心，因為計劃趕不上變化，現在主要在室內取景：「每晚收工返屋企都會做檢測，冇問題先接觸個女。（囡囡李元元喺屋企悶到爆？）佢日日都悶㗎啦！冇得出街放電嘛！（搵個女客串？）唔會，自己都危險，仲帶佢出嚟客串？冇疫情先再講。（帶佢打疫苗？）佢今年4歲，都有咁嘅諗法，但最擔心排隊嘅時候多人。」

至於阿Dee則對角色大賣關子，自誇演繹成功可以攞影帝！問可有趁機向「女神」林明禎攞電話？他笑說：「冇，拍戲嘅時候要高度集中。（佢就嚟拍完喇喎！）咁我要把握機會合照，今次劇中完全冇親熱戲，留番下一部，可能李安搵我拍戲露蛋蛋呢！佢搵我一定接。（ViuTV有爆疫風險？）呢排做咗10次、8次檢測，真係好煩，心理都唔平衡，惟有聽ERROR嘅新歌《愛情值日生》平衡情緒。」不忘為組合宣傳，不愧為副隊長！