健達人：減肥全靠呃自己！應智越鍾情「多人運動」

曾參加《全民造星》的歌手「細貓」應智越，體重一度重達80kg，試過無數減肥法，歸納出一套獨門心得，他形容方法是「欺騙身體」。他試過日日跑步，身體脂肪好快消耗，但跌到一定磅數便會停，他說：「最近發現可以呃自己身體，因為唔同運動嘅力度、強度唔一樣，身體就需要時間適應。依家我會健身、打泰拳、踢波、跑步、踩單車同跳舞，可以訓練到唔同部位嘅肌肉，令身體再減瘦。」他覺得一個人運動靠信念維持，容易被動搖，若多人運動如踢波、跳舞等，更容易持之以恒。