傳咀出愛火 車廂幽會 丁子朗閘住「戀情」 戴祖儀心痛

戴祖儀與丁子朗（丁丁）外形匹配兼年紀相若，早前在劇集《青春不要臉》飾演情侶，結局篇上演一幕梳化激戰戲，引來極大回響，更有傳他們咀出愛火！日前他們在電視城完成宣傳工作後，被拍到各自揸車離開，丁丁將戰車駛入附近一個屋苑停車場，然後鬼祟地坐上祖儀早已停泊在屋苑外的座駕。兩人在車廂「談心」15分鐘，丁丁再電召一部7人車離去，與女方扮前後腳驅車前往西貢。

報道出街後，丁丁回覆記者指一切純屬誤會：「真係有少少流，當日只不過係佢唔識路，所以同我一齊等我個Friend架車嚟，跟住揸去另一個朋友屋企。我仲同佢講『都係費事上你架車等喇，費事畀人話我哋幽會』，點知真係畀人影到，唉……都真係有少少無聊。」問到雙方是否有機會發展？他斬釘截鐵表示：「多謝大家咁鍾意套劇囉，我同佢係100%朋友，落閘！冇可能發展！」而他之前曾與前華姐林宣妤傳緋聞。

至於祖儀則在社交網發文否認緋聞，並公開與丁丁的錄音對話記錄正視聽：「當日與丁子朗做完《青春不要臉》的宣傳活動後，因為疫情關係，我們都決定避免外出食飯，所以我們去公司的同事家食飯，討論將來的工作，與最近的表現評價。本來丁子朗是跟經理人車去的，但因為經理人未到，所以他就上了我的車等，然後就是大家見到封面的那一張相，大約5分鐘後，他經理人到了，他就落車改乘經理人的車過去，就是這麼簡單。」對於粉絲為她「拍拖」感高興，她搞笑說：「不是事實，惟有抱着心痛和可惜嘅心情，說一聲：又要粉絲們失望了。」