消失兩年 冇停過手 黃浩然夠理智 唔同兄弟爭女

現實生活中的浩然擁有幸福家庭，離開無綫、簽約古天樂旗下後，他更希望事業家庭兩兼顧。談到愛情觀，浩然坦言從小已屬理智型：「我重視感情，但唔係冇咗女友會死嗰一類人，反而我太太比較感性。（有冇試過同好兄弟鍾意同一異性？）做得兄弟應該都聞到陣除，如果對方隱瞞亦唔係兄弟啦，好彩我嘅人生比較簡單。」

加盟古天樂旗下兩年，浩然共拍了3部電影及3部劇集：「只係未有嘢出街，大家覺得我消失咗，好彩《家》劇喺內地推出反應唔錯。（今次角色踩界，唔驚畀人鬧？）畀人鬧咪成功囉！（過唔足戲癮？）係早咗啲拎飯盒（收工），但為我嚟講佔戲16集角色發展好圓滿，所有嘢都交代清楚。」

談到第3次與茜堯鬥戲，浩然對她讚不絕口：「我第一次演清裝剃頭，已經同佢演兩夫妻。佢由𡃁妹到依家做咗人媽媽，氣場更加強大，比專業更專業。（私底下少聯絡？）係，廿幾年嚟我都唔埋堆，相信有緣分就自自然然合作到。」

而無綫昨日公布最新一星期的收視成績全面攀升，《家》劇不負浩然所望，首周電視直播收視平均22.9點，暫列2021年至今兩線劇收視的第2位；《鐵拳英雄》比上周高2點，有22.4點，《愛．回家之開心速遞》有26.3點，周日的《青春本我》及《思家大戰》同樣報捷，分別是26.2及19.7點。《2022北京冬季奧運會》的開幕典禮在翡翠台有19.8點，至於周六日J2台的黃金直擊，都有4.5及4.4點。