與男友出巡 錫錫晒恩愛 Rihanna露巨肚證懷孕

一直夢想成為母親的Rihanna，上周末在美國紐約哈林區與A$AP Rocky拍拖外出，她特地打開身上長身外套的腹部位置裸露巨肚，巨肚上還以巨型金十字架與其他珠寶點綴，證實真的大肚了！兩人在攝影師前擺出各種恩愛甫士，除了十指緊扣，A$AP Rocky又搭住Rihanna的膊頭錫她的額頭。因為天氣寒冷，他們影完相很快就回家。兩人相識多年，2020年底開始拍拖。

Rihanna父親Ronald Fenty前日於巴巴多斯受訪時表示：「我超開心，開心到跳起。我仲係好興奮。Rihanna成日都話想要小朋友，佢好鍾意小朋友。佢成日都照顧親戚啲細路……佢會係個好媽媽。」Rihanna於2020年底曾帶A$AP Rocky回鄉見家長，Ronald對未來女婿很是滿意：「佢好好人，我鍾意佢。」Rihanna一度與曾是酒鬼癮君子的父親決裂，甚至準備對簿公堂，其後和好，Ronald透露Rihanna於周日晚打電話給他報喜：「我尋晚先收到佢消息，佢又寄咗啲相我睇。我真係好開心，佢由內到外都咁靚。」