箍煲成功 老婆又有餡？張致恒：一家五口愛下去

「負評王」張致恒（Steven）劈腿、欠債事件簿水蛇春，曾多番力撐他的太太雯雯，日前疑終「頂唔順」在社交網宣布離婚，而潛水3日的Steven昨日「蒲頭」，在社交網上載一家四口的舊相，撰長文聲稱已和太太雨過天青，更點雯雯的全名示愛，不過雯雯未有回應或更新社交網，未知是否真原諒老公，還是男方一廂情願。

Steven在社交網的「剖白文」中，再次發表「錯而能改」的正面態度，指「人嘅一生中總會犯唔同嘅錯，感情事、工作事、家庭事、友情事，但係最重要係犯錯過後點樣去反省改過繼續行前面嘅路。」對太太的不離不棄心存感激，多謝她在這2年多的包容，更重點指出夫妻間經過幾日溝通後，有共識齊「忘記過去，展望將來」，他聲稱：「我哋決定繼續一齊行前面嘅路，兩夫妻有好多嘢要學習，仲有好長好長嘅路要大家一齊學習。」還Sweet爆的以中英文示愛，表示會「好好愛下去，I love u區燕雯。」

之後，他又再更新該發文，加上「一家五口好好咁樣愛下去」字句，由於Steven、太太及兩名兒子只有「四口」，故惹人懷疑雯雯又有餡，不過亦有可能包括其飼養了約9年的哥基犬，而Steven的經理人只說：「我都唔清楚，佢嘅家事由佢回應好了。」