張智霖讚勤力！ 羅子溢楊茜堯不設防追多個

張智霖（Chilam），羅子溢、黃浩然、熊黛林（Lynn）及梁靖琪（Toby）等，昨日宣傳劇集《家族榮耀》。該劇於內地上架後成績不俗，台前幕後飲得杯落。身在內地逾8個月的Chilam透露日前終於返港，翌日即錄影春晚節目：「返嚟好掛住屋企人，最唔習慣係揸車，好似要重新摸索一樣。已經打咗一場麻雀，不過隔咁耐同啲麻雀唔係好熟，朋友預先發咗新年財。（幾時再走？）留到5月，嚟緊我會喺香港拍一套劇。」

忙於湊仔的子溢自言是太太楊茜堯助手，經常爭取「放風」時間：「陪老婆坐月好悶，我成日舉手出去買餸同物資。」對於Chilam與茜堯於劇中頗多親熱戲，子溢即「加碼」與李彩華調情：「我哋好獨立，我都要留番條後路畀自己，如果唔係日後我拍親熱戲點算？不過今次真係要求加咗同彩華嘅sweet sweet場面，因為想將現實夫妻嘅事融入劇情，已經收斂咗喇。」Chilam笑言：「子溢好『勤力』㗎，如果唔係點會有兩個小朋友？」子溢說：「有兩個好滿足，但我又冇特別避（孕）。（點解老婆唔出現？）佢話想坐耐啲月，又話自己生完高咗，我同佢講，咁你生多胎咪仲高過我囉！」

另外，將於4月臨盆的Toby腹大便便，依然腳踏3吋高踭鞋，她笑言獲老公「御准」，並自爆今胎依然佗仔：「我都好想追個女。（再生？）呢胎佗得好辛苦，生完會封肚，同埋今次應該開刀生。」記者打趣叫她與Lynn對親家，Lynn表示：「疫情過後我帶兩個女嚟同你兩個仔玩，睇吓啱唔啱玩啦。」Toby即叫Lynn「追仔」，Lynn耍手兼擰頭說：「我已經同老公講唔使旨意，我唔想再搬屋，況且孖女已經4歲，佢哋開始有自己嘅世界，我唔想由頭再嚟多次，一定會崩潰！」