谷新歌喜迎春 陶大宇豬籠入水 唔會身痕

陶大宇昨日到花墟派福袋宣傳賀年新歌《紅陶大宇喜迎春》，憑翻唱《倒轉地球》爆紅的他希望歌曲能為大家帶來歡樂，他笑說：「首歌之前喺內地錄，以我嘅資質，一個下午就搞掂啦！自己嘅戲劇作品就多，第一次擁有一首自己嘅歌，感覺好開心，好多謝製作人畀我嘅鼓勵同信心。」

原本大宇會為新歌拍攝MV，但因疫情而擱置，他說：「諗住喺花墟拍吓買花、運吓桔，同市民喜氣洋洋，可惜依家情況唔許可，只能夠將錄音花絮剪輯。」對於網民投訴新歌入面唔夠「噓」，大宇笑說：「原本係連『噓』都冇，係我提議加落去，呢個特色一定要，係首歌嘅關鍵，希望『噓』一聲，開心嘅保持氣勢，唔開心嘅就噓走啲衰氣。」

人氣爆燈的他被問到豈不是豬籠入水？他說：「有工作就有收入，冇特別去計幾多。（買禮物獎勵自己？）我部車揸咗10幾年都冇換過，唔會一手鬆就身痕，應付到基本需要已經好滿足。不過以前買衫要先睇價錢牌，依家就睇靚唔靚，可以長期係咁都好幸福。」