姜濤母校搵自卑起點：我真係跌得好低

男團MIRROR的人氣王姜濤最近在一段紀錄片中揭示自卑的過去。近年一出街便被粉絲「私追」的他，今次終於可以嘗試在沒有被騷擾的情況下行商場購物，全黑造型包到冚，與幾位工作人員結伴搭港鐵、電車，令他忍不住開心大嗌：「行商場喎，幾咁奢侈嘅事呀！」

之後，他重返母校探老師，又去到第一次表演的學校禮堂，重溫當年表演時的青澀舊照，他感觸表示：「呢間學校係帶畀我最嚴重自卑嘅地方，我所有嘅自卑、所有唔自信，都係來自呢間學校，大個先愈嚟愈變得懂事。」他自爆求學時期因體胖，每次上游水堂均不敢脫衣，即使每日跑步，望着其他同學都會覺得好自卑：「可能人哋睇我係好高峰嘅位置，但其實我真係跌得好低……所以千祈唔好太容易定義一個人，冇人定義到。」

姜濤坦言推出新歌《鏡中鏡》是想反擊其他人，但事後感到沒有意義，最終還是需要找方法令自己堅強：「好多道理大家都知，但真正做到，要經歷好長嘅時間，起碼我搵到方向，知道邊條係啱嘅路，拍完呢個紀錄片，出完呢隻歌，都會有唔開心嘅時候，但起碼我知道有方法。」