鄧麗欣本性麻甩匿埋跳掣

女星鄧麗欣於電影《飯氣攻心》周旋於兩兄弟之間，當中與飾演細佬的張繼聰不乏對手戲，她日前受訪時，笑指對方喜感入骨，拍攝時能帶動現場歡樂氣氛：「全場人真係笑到傻咗，搞到好多NG，最多10幾20個take。」平日走淑女路線的她，今次演一個麻甩又跳掣的女仔，笑指角色如同真實的自己：「私下嘅我係比較男仔頭，不拘小節，亦有跳掣一面，本身好注意生活平衡，有時如果做唔到就會自己跳，會同自己講嘢、收埋自己，呢一面唔會畀人見到，但同住嘅媽咪就習慣晒。」