苦主怒斥蝕入肉 臨陣煞停賭城騷 Adele爆喊補鑊

原定昨日在拉斯維加斯賭場開始舉行駐場演唱會的Adele，開騷前24小時才透過社交網發布自拍短片，宣布在疫情影響下要押後舉行整個駐場騷，一度激動落淚。

Adele在片中表示：「好對唔住，但我個騷未準備好。我有一半工作人員中咗新冠病毒，唔可能完成個騷，啲貨運延期亦打亂晒計劃。我已經有30小時冇瞓覺，嘗試盡力挽救，但都係搞唔掂。」並向已前往拉斯維加斯的粉絲道歉：「喺最後一刻先講，對唔住。我好唔開心，亦好慚愧，要再同去咗嗰度嘅人講對唔住。我哋會重新安排日子，依家搞緊，我係會完成個騷！」

不少粉絲都體諒Adele的決定，但亦有已訂機票及酒店房間的粉絲極為憤怒。據稱有人為今次演唱會花了約1.4萬港元，直指若Adele早些宣布取消演出，或可更容易獲得退款，其中一個苦主受訪時直言：「我好嬲Adele要等到最後一刻先宣布！我明白冇藝人想宣布取消開騷，但佢應該早一日就知道個騷搞唔成！」