貪錢辣妹 唔做淑女 唐詩詠中穿心腿 忍痛撻生魚

藝人陳展鵬、唐詩詠、陳山聰、姚子羚等主演的無綫劇集《鐵拳英雄》前晚播映第2集，眾演員的「成年版」陸續登場，向來演開斯文角色的詩詠，今次一改戲路，除了首次拍打戲做打女之外，其角色更是貪錢、狡猾又搞笑，當中一場被小朋友偷錢的戲份，她一手揪着對方衫領盤問，粗魯到不得了；之後她又被元秋打到跌落水，四腳朝天。而劇中喜歡她的伍允龍，角色性格傻更更，喜感十足，他為幫詩詠籌錢而打黑拳，詩詠卻對着他呼呼喝喝，當救伍允龍出差館時，她更潑辣的說：「你次次踩完屎都要我幫你抆嘅！」

被元秋打落水的一場戲，詩詠乃親自上陣沒有替身，她昨日受訪時說：「撻到我成隻嘢咁呀！我係企咗喺個高台，然後佢哋（工作人員）一嘢好大力咁踢落我心口，我就撻咗落水，因為佢哋唔踢我落去，我都唔識用力，我第一次拍呢啲，嗰刻我真係冇諗過任何嘢。武師有提我要Lock實條頸，唔係就好容易扭親。（好痛喎！）咁樣撻落去道力好大，係痛嘅，嗰一刻好驚，但都唔敢諗咁多。」

此外，陳山聰於劇中的泰國警察造型相當有型，最尾一場回頭一望，更是殺死人。而陳展鵬、伍允龍、姚子羚、元秋等都打到飛起，展鵬於劇中不時要講潮州話，網民大讚搞笑又過癮。