各門各派爭做最強 陳展鵬發燒打冧台 唐詩詠無悔周身傷

無綫劇集《鐵拳英雄》今晚9時30分於翡翠台首播，此劇由2016年口碑、收視俱佳的《城寨英雄》原有班底坐鎮，由監製文偉鴻率領陳展鵬、陳山聰、唐詩詠、姚子羚、元秋、伍允龍及王君馨等擔演。故事以50、60年代的曼谷為背景，劇中個個身懷「秘」技打到飛起，劇迷引頸以待。

監製受訪時表示此劇並非《城》劇續集，劇情講述當時大家於曼谷安居樂業，但被不同惡勢力入侵，因而掀起鬥爭，大家即站出來保衞家園。此劇以2大謎團貫穿整個故事，展鵬與山聰的父親本來是英雄俠士，由救人演變成互相廝殺而死，但矛頭直指向展鵬父親。之後展鵬與母親元秋尋找失散弟妹，最終瘋瘋癲癲的元秋回到曼谷，展鵬為了尋母，於曼谷與惡勢力周旋！

劇中展鵬、詩詠與伍允龍譜出3角關係，伍允龍性格正義，傻更更得來相當活潑，監製笑言為其開拓新戲路。而大反派是歐瑞偉及張國強，歐瑞偉向來重男輕女，兒子是敖嘉年與陳國峰，女兒姚子羚則永遠要為父親收拾殘局。而首次拍打戲的詩詠要跟大隻佬李嘉、易宇航對打，打到手都瘀，監製更大爆她愛上展鵬後，會有搞笑的「餓女追男」戲份。至於山聰與子羚再演情侶，2人同樣「堅揪」。

陳展鵬表示拍此劇時正值女兒小豬比將出世，心情緊張，既要照顧太太，又要應付多場打戲：「拍拍吓真係好煎熬，自己都唔係好出聲，其他拍檔都會覺得好奇怪，好在同事都明白。」其中一場他與易宇航打擂台的戲份，展鵬以「忘我」來形容：「記得當時自己發緊燒，但又要同易宇航做對手，佢有打開擂台，場戲講佢掟我埋牆，成個布景跌咗6成，大家都好驚，要搭番先可以再拍，之後都有同打得嘅敖嘉年、陳國峰做對手，基本上打勻咁多個男人，好難忘！」

而唐詩詠坦言多謝監製「扭轉」她：「今次角色同以往係180度唔同，粗魯、麻煩，為咗錢不擇手段，唯一有樣好就係有義氣。當初監製搵我，我呆咗3秒，因為未接觸過，每日我都同自己講要進步。打戲我真係冇乜潛質，要比其他演員花多3倍努力，唔使開工時會搵師傅學動作，希望做得靚啲。我唔敢講自己做得好唔好，但真係花咗200分努力。」至於飾演貪錢警察的陳山聰表示：「大家都拍得好辛苦，係我入行以來打得最甘嘅一次，劇入面我係泰國華僑，監製第一次要求我要瘦得好『乾身』。如果大家鍾意睇拳拳到肉嘅戲，真係要睇。」