拍拖隨緣 等緊代表作 何依婷要實力取勝：我唔係嚟玩

何依婷（Regina）2017年參選港姐贏得亞軍後入行，在剛播畢的《十月初五的月光》初次擔正女一，她指壓力不算大：「全副心機放喺點去演，冇時間諗其他嘢，只係擔心做得唔好，因為我做事一向盡全力，令自己唔會後悔。（滿唔滿意自己表現？）開心嘅，因為好似自己個Baby終於出世，作為新人仲有好多嘢去學習進步，唔會因為一套劇自滿。」

她坦言是個硬頸的人，會堅持做好每件事：「未成功唔好灰心，總有一日會得，不過有時都令到屋企人擔心。（例如呢？）揀男友囉，哈哈！當年讀大學，媽咪好唔鍾意個男仔，但我覺得幾好所以堅持一齊，因為我係一個好易感動好易呃嘅人，男仔對我好少少就覺得可以付託終生，佢哋會話『你唔係想嫁畀佢吓話？』」

隨着思想成熟了，男人的甜言蜜語攻勢已無效：「性格好緊要，樂觀、有風度同幽默感、有男子氣慨不拘小節，唔好郁啲發脾氣鬧我。（會唔會好難搵？）隨緣啦，又唔係急，呢幾年好重要，想等事業上足夠成熟先。（攞埋視后先？）又唔係，想試吓可以去到幾遠，keep住拍，有自己代表作先，想畀人覺得何依婷係有實力，唔係嚟玩，唔係只賣樣嘅。」

她自言很欣賞陳法拉，會以她為目標：「佢好叻好堅持，喺TVB開始演起，再去外國進修，然後拍出套好電影，佢一定係付出咗好多我哋唔知嘅努力，好欣賞佢嘅熱誠同勇氣。」