湯洛雯處女開槍嗌緊張 陳展鵬冇經驗 唔識應付三角戀

日前陳展鵬、黃智雯和湯洛雯為無綫新劇《隱門》拍外景，展鵬透露於劇中有三角戀，現實中的他不喜歡拖泥帶水︰「一就一、二就二，唔好嘥大家時間。」並自嘲：「要有番咁上下歷練先應付到，但我冇囉，哈哈！」懂得善用時間的他，有空檔便拉筋，他說：「每套劇都少不免有動作場面，所以一定要保持最佳狀態。」演過不少動作劇的他直言很想拍「打鑊甘」的作品︰「要勁過《城寨英雄》，搵啲勁人一齊拍，實牙實齒咁打，唔係花拳繡腿！」

劇中經常被「父親」吳岱融家暴的智雯，坦言首次被男人打：「要被大巴摑面同捏頸。（有冇就住打？）岱哥好專業，力度上有調節，但道氣冇留力，你會感受到嗰份威力，更易入戲。」並指最大挑戰是調整情緒：「角色要經常處於好驚嘅狀態同負面情緒。（會唔會抽離唔到？）所以我返到屋企會乜都唔做，衫都唔換坐喺度發呆30分鐘放鬆吓。」

至於飾演女沙展的湯洛雯表示：「首次做警察同用槍，要學掹槍同揸槍手勢，加上之前艾力寶雲單意外，我又比較『論盡』，真係有啲緊張。（男友馬國明好擔心？）關佢咩事？應該係展鵬擔心至真，哈哈！」雖然只用氣槍拍攝，但她會問清楚道具同事，以策安全。