自我質疑 衝動還擊 姜濤嬲完笑番 與負評共存

冧莊奪得「我最喜愛男歌手」的人氣王姜濤曾自揭有抑鬱症，昨午他接受電台《叱咤樂壇》網上直播訪問，談到新歌《鏡中鏡》正是講述其內心寫照，他坦言由去年奪得男歌手後，外界對他有好多質疑，也令他質疑自己，他說：「上年情緒一度好差，各種聲音都有，令我好似唔知自己做緊乜。」他坦言當時製作《Master Class》時，確有少少衝動及不成熟：「因為有太多個人情緒，隻歌係講反抗反擊，我希望將真實嘅自己畀大家睇，大家鍾意又好唔鍾意都好，我問心無愧。」

《鏡》本來是緊接推出的第2首作品，但當時未有完整概念，他說：「諗住用更加強烈字眼去攻擊番攻擊我嘅人，當時冇諗咁多。（最介意人哋講乜？）冇話咩，咩都有，可能『你成日拍咁多廣告都唔係歌手』，類似種種聲音，令到我好質疑自己，但內心同自己講要冷靜先，一定有解決方法，經過一年後先知，呢啲嘢唔會完，所有聲音都好，只要一日喺呢行都一定會受到呢啲質疑，係冇辦法對抗，就只好共存、帶住呢啲聲音行落去，既然消除唔到呢啲聲音，我諗我可以一笑置之。」

姜濤坦言會自我調節，他說：「令自己唔開心係自己，開解番都係自己，我習慣同自己相處，最好嘅朋友都係自己。」最近他研究佛學，又睇道家的莊子、老子，人與人之間有種緣分，能夠行到這步，覺得冥冥中有某種力量幫他，本來沒信仰的他，近日好相信前世今生，更自爆今世有莫名其妙記憶，心裏面忽然有組密碼，他說：「我嘅電腦銀行都係用嗰組密碼，係冇意義，唔係我嘅生日，係突然有一日出現，覺得係我前世用過，好神奇。」曾經計劃29歲退休，他笑言買樓退休的人生目標冇變：「人生冇話一定，可能下年，講笑。」

此外，姜濤經常在籃球場與友人打波，因第5波疫情影響，政府再收緊防疫措施，前晚他被發現趁「封場」前跟疑似Edan現身柴灣籃球場打波，有人偷拍他的照片放上網，粉絲聞風飛撲而至，但因姜濤已快閃而撲空，有「鏡粉」指姜濤已非第一次到該場打波，呼籲刪相給他私人空間，結果又掀罵戰。