樂壇「聯頒」第一步 《香港金曲》4月搞 李幸倪兩食白果等開齋 胡鴻鈞無懼失大獎

無綫與港台破格首度合辦《香港金曲頒獎典禮2021/2022》，昨日在將軍澳電視城舉行記者會，獲兩台代表、業界機構、各大唱片公司數十位歌手出席，並宣布將於4月3日在九展舉行頒獎禮。獎項由觀眾網上投票及各界專業音樂人投票選出，屆時將頒發13個類別獎項，包括「金曲獎」、「男、女歌手大獎」等。大合照時，司儀李浩林提議台上數十名嘉賓及歌手深呼吸一口氣後除口罩影相，但考慮到現時疫情嚴重，一眾歌手即顯得十分猶豫，期間無綫總經理曾志偉及樂易玲一度除罩，但在工作人員提醒下秒速戴回口罩，最後眾人齊齊戴罩合照。

曾志偉表示期待辦一個有公信力、認受性的頒獎禮：「一直想做一個樂壇頒獎禮，今日未做到，但踏出第一步，希望日後同更多唔同媒體合作，樂壇頒獎禮應該有新局面。」而港台顧問（節目）何重恩表示該台的前助理廣播處長早年亦有此打算：「張文新10年前都同張學友講過想四台合辦，雖然未達到最終目標，但今日係第一步。」問到ViuTV藝人如MIRROR及ERROR可會參與頒獎禮？他表示：「其實記者會有請佢哋嚟，但佢哋太忙嚟唔到，希望到時頒獎禮可以參與。」志偉亦歡迎MIRROR亮相《勁歌金曲》等音樂節目，又表示《聲夢傳奇》學員如果獲邀，亦可以亮相ViuTV的《Chill Club》。

講到今次評分機制，何重恩表示：「我哋中文榜每年都會有入榜歌，TVB都有佢哋嘅榜，統計咗之後我哋會集合一個候選名單，到時就有專業評審同埋民意調查，加埋總分就會得出得獎者，係公平透明嘅機制。」

而去年獲得勁歌金曲頒獎禮「最受歡迎男歌星」的胡鴻鈞，問到合辦後可會擔心變相增加競爭，以致無法冧莊？他說：「我覺得多人參與最緊要，對歌手同聽眾都係好事，今次行出第一步，將香港音樂團結起嚟。（唔想蟬聯？）冇人唔想攞獎，但我抱平常心，睇好張敬軒。」而晒腿現身的李幸倪（Gin Lee）則說：「呢個方案提議多年，今次兩台有新嘗試係個新開始，帶動團結力量。」講到之前在《新城》及《叱咤》頒獎禮都未有獎項，她坦言希望在這次頒獎禮有收穫。