頒獎禮叫3飛準備開齋姜麗文「姐姐話」煞食街市攞着數

姜麗文在台慶頒獎禮以熱門姿態叫「3飛」爭獎，「開齋」機會極高。昨日收工後，她挽住紅白藍買餸袋，到街市買食材打邊爐，更以「姐姐話」搞氣氛。

姜麗文（Lesley）憑無綫處境劇《愛．回家之開心速遞》飾演外傭（Lisa）一角彈出，將菲律賓式廣東話發揮得淋漓盡致，充滿喜感，而她在《星空下的仁醫》飾演病童母親，催淚演技亦令人刮目相看，被網民激讚果然是好戲之人秦沛的寶貝女。

戴口罩被認出

今年表現出色的Lesley於周日舉行的無綫《萬千星輝頒獎典禮2021》中叫「3飛」，包括「最受歡迎電視女角色」、「最佳女配角」及「飛躍進步女藝員」，奪獎呼聲相當高。昨日傍晚她在將軍澳電視城收工後即變身師奶仔，手挽紅白藍袋趕往將軍澳一個街市買餸，雖然戴住口罩，但仍被不少師奶認出，頻頻與「Lisa」打招呼。

她與未婚夫已經訂婚3年，卻似乎已是「資深家庭主婦」，在街市兜個圈已經迅速買了蔬菜、雞蛋、生果，路過人頭湧湧的凍肉檔，亦趁墟八卦一番，兼且與師奶交流凍肉行情。檔主認出Lisa，即親切地用姐姐話推介打邊爐凍肉，她自然以「正宗」姐姐話回答：「係咪真係正㗎？」逗得大家相當開心。她買了火鍋凍肉便離開街市，返回將軍澳寓所。

講兩句搞氣氛

Lesley接受電話訪問時，被問到用姐姐話買餸是否多着數？她說：「除咗拍劇其實好少講，因為自己好尊重『姐姐』，有時對方講先，我就會講一兩句搞吓氣氛，都好開心Lisa帶到歡樂畀大家。自己成日去街市買餸，檔主有時認到我，都有啲着數嘅，買魚會大條啲，或者送多兩條菜，哈哈。」