游嘉欣JW賽前投降 等睇姜麗文「飛躍」

無綫《萬千星輝頒獎禮2021》將於本周日舉行，打入「飛躍進步男、女藝員」最後5強的部分藝人，包括JW、游嘉欣、姜麗文、羅天宇及林正峰，昨日在將軍澳電視城造勢。首次入圍「女飛躍」的JW與游嘉欣率先投降，不約而同睇好姜麗文攞獎，JW表示首次提名入5強已經當贏，她笑說：「雖然都覺得自己有飛躍到，但其他人實在太犀利。今年有好多新嘗試，例如做《聲夢傳奇》導師、拍劇，已經踏出咗舒適圈。（睇好邊個？）如果有兩票，我會投畀陳瀅同姜麗文，佢哋入行多年嚟都好努力。」

游嘉欣則準備了魚尾裙出席頒獎禮，雖自覺大有進步，由籍籍無名到開始有人認識，但覺得對手太強，攞獎機會極微：「我睇好姜麗文，佢喺《愛．回家之開心速遞》同《星空下的仁醫》都做得好好。」

第3度挑戰「男飛躍」的羅天宇自言信心還可以，但覺得去年的《香港愛情故事》反而攞獎機會較大，更因而失眠，今年抱平常心則有覺好瞓！如果攞獎，他希望準備了數年的致謝詞不會有遺漏：「我睇好胡鴻鈞，佢唱歌、演戲都好好，《十月初五的月光》第一次做『男一』，處理經典角色好好。」對手林正峰打定輸數，睇好羅天宇跑出，所以完全不緊張。