反駁史高西斯「不是電影」論 「蜘蛛俠」Tom撐超英片係藝術：只係貴好多

漫威超級英雄片近年成為影壇主流，令不少行內人不滿，史高西斯便曾批評漫威電影「不是電影，只是主題公園遊戲」。其言論在影壇有人認同，有人反對，網友亦引述各個名人立場以證明自己正確，罵戰不斷！主演《蜘蛛俠：不戰無歸》（Spider-Man:No Way Home）的英國男星Tom Holland，受訪時反駁史高西斯：「你可以問吓史高西斯：『你想唔想拍套漫威電影？』但佢都唔知實際上係點，因為佢未拍過。我拍過，亦拍過一啲會有機會攞奧斯卡嘅電影，其實唯一分別就係其中一個成本貴好多！但我點樣拆解個角色、個導演點樣刻畫個故事弧線同人物，係全部都一樣，只不過係唔同規模。所以我認為超級英雄片係真正藝術。」

Tom續表示：「當你拍呢類超級英雄電影時，你都預咗無論好與壞，都有成千上萬嘅觀眾入場睇，但如果你拍小型獨立電影，如果佢唔係好好睇就會冇人入場，所以兩者個壓力唔同。你又可以問吓（奇異博士）班尼狄甘巴貝治（Benedict Cumberbatch）、（鐵甲奇俠）羅拔唐尼（Robert Downey Jr.）同（黑寡婦）史嘉娜祖漢遜（Scarlett Johansson），佢哋都拍過所謂奧斯卡攞獎戲，亦拍超級英雄片，佢哋都會話你聽兩者係一樣，只係規模唔同。同埋奧斯卡電影冇咁多緊身衣囉！」

另外，Tom戲內戲外的女友Zendaya日前於社交網站上載自拍照，留言表示：「係時候轉變。」網友留意到她手上有疑似婚戒，引起她與Tom秘密訂婚的猜測！