普天同慶笑吓啦！ 姚焯菲炎明熹 「自炒」冧Fans

姚焯菲（Chantel）、冼靖峰（Archie）、姜麗文與周嘉洛昨午出席活動，吸引大批Fans撐場。提及最難忘的聖誕節，Chantel指疫情前舉家到澳洲旅遊，首次過熱辣辣聖誕，問有否幻想與男友過平安夜？她怕醜說：「依家讀書先啦！平安夜我約咗Fans去應援燈箱打卡。」她與炎明熹（Gigi）又不約而同開心Share「炒車相」，她公開「為食樣」，而Gigi則出賣雙下巴，Fans睇得非常開心！

至於Archie透露大學時期，曾到英國當交換生半年，首次在飛機上過聖誕：「我當時瞓緊覺，同學拍片畀我睇番。」又自爆當年不停走堂遊遍歐洲，幸最終修畢學分，順利畢業。另外，他表示已錄好第一首派台歌，並完成MV拍攝，預計1月初推出：「本來只係17個鐘，但之前嗰晚失眠，加埋足足有40個鐘冇瞓！」

姜麗文則分享新年願望，直言希望早日完成婚禮：「真係等咗好耐，因為我哋好多重要嘅屋企人都喺外國，希望通關，等老人家返嚟唔使隔離。」提到3料入圍《萬千星輝頒獎典禮2021》，她開心說：「最近見到好多Auntie同Uncle，爸爸（秦沛）不斷同人講自己係『姜麗文爸爸』，又話有啲菲律賓姐姐會主動問佢係咪我爸爸，跟住同我打氣，感受到佢真係好開心！」

周嘉洛亦入圍「最受歡迎電視男角色」5強，揚言有20%信心：「5個人入圍嘛！我有半年冇喺電視出現，入圍好開心。（聖誕約咗緋聞女友？）有緋聞，冇女友，希望嚟緊低調啲，專心工作，如果話我掛住女人，嗰個咪滕麗名囉！」