期待上頒獎台 許靖韻失聲匿埋喊險「鬱」到病

許靖韻（Angela）早幾年忙於在內地工作，錯過不少頒獎禮，今年她已準備好靚衫，她興奮地說：「好期待、好興奮，因為好多朋友會出席，覺得去頒獎禮好似去Party、睇騷咁。（想攞獎？）希望可以唱歌啦！」過往每個獎項都會當作禮物送給媽咪的她，今年也希望「有禮物」。

可能人愈大愈覺得陪伴家人重要，她透露今年媽咪農曆生日剛好是Boxing Day，能夠陪媽咪慶生、做冬和過聖誕，感覺好幸福，她更約好大學同學一起行年宵，節目安排密麻麻。

向來樂觀正面的Angela，早前因感冒亂食藥而失聲，情緒低落到陷「不正常」狀態，入夜便以淚洗面，完全無法理解，低潮持續一星期，她說：「覺得工作上做得不足，加上歌手冇咗把聲好慘，乜都做唔到，練唔到歌，好似好冇用。我想喊就會喊好耐，一諗就喊，情緒好低落，又唔敢見朋友，日日匿喺屋企，嚇親屋企人。（擔心有情緒病？）真係懷疑自己係咪有情緒病，應該冇嘅，過咗最唔開心嘅時間就樂觀番，因為把聲返咗嚟。」