關注血友病 任活動大使 劉俊謙忙到失魂 送鐘氹女友

劉俊謙昨日以活動大使身份，出席「關注血友病˙全城為你加油」啟動禮，跟前港隊單車運動員馬詠茹即席踩單車為血友病病人打氣。

正趕拍新戲《九龍城寨˙圍城》的劉俊謙，受訪時自爆只向劇組請了2小時假，之後要趕返片場：「拳打腳踢，打到飛起！仲要通宵打交，我都未試過，原來好High㗎！」

他透露跟林峯最多對手戲，大讚經常獲對方鼓勵，又叫他放心出招：「佢經驗多我好多，心理輔導我唔怕整親佢，令我喺拍攝上都放開啲，我冇打傷林峯㗎！因為故事係講九龍城寨，片場比較昏暗同狹窄，石屎牆容易刮親手。」

因新戲日夜交替拍攝，劉俊謙笑言長期睡眠不足，豈不是沒時間陪女友蔡思韵？他直言就連聖誕除夕也不能拍拖，可會買禮物氹對方？他口不擇言笑說：「買個鐘畀佢自己倒數！（『大吉利是』呀！）講笑啫！如果唔係拍攝緊就視像同佢倒數，其實佢都要開工，所以會明白，之後再補番！」

講到有傳張敬軒客串由他主演的ViuTV新劇《940920》，他即大賣關子：「唔會答你係定唔係，因為可能會冇咗驚喜，你哋自己估啦！如無意外會明年2月播。」想同對方合作？他坦言好想，並指好欣賞軒仔：「由細聽佢啲歌大，見到佢就似朋友、陪伴我成長嘅哥哥、合作夥伴，係有火花嘅。」

另外，談到剛才跟馬詠茹切磋，劉俊謙笑言都是量力而為：「細個返學都係踩單車，踩開吐露港。（邊踩邊望女仔？）唔睇㗎！以前做運動好專注望前面條路，冇兒女私情！」