新郎利是答謝媒人 張秀文教堂行禮 Bob地位超然

34D無綫咪神張秀文上月宣布封盤，與拍拖1年多、「皮草太子爺」王大業的堂弟王大權（Billy）共諧連理，而昨日正是一對新人的大喜日子，他們於教堂舉行婚禮，而「媒人」林盛斌（Bob）亦有到場祝賀，事後將與一對新人的合照放上社交平台，他留言：「又搞掂一單！恭喜恭喜！」

事後Bob受訪時坦言見到好友有情人終成眷屬很開心，他謂：「要好多謝佢哋特別安排，完咗簽字儀式之後，佢哋喺教堂入面同屋企人合照，影完兩張最重要嘅男家、女家後，主持人開咪叫我上去單獨同佢哋影相，突然之間覺得自己地位好崇高，哈哈！成個過程都好感動，特別係佢哋講誓言嘅時候，我都眼濕濕！最好笑嘅係佢哋嘅爸爸媽媽同親戚不斷咁同我講多謝，有兩個親戚仲問我有冇筍盤介紹畀佢個女！」

Bob的開心與「驚」喜似乎比一對新人還要多，笑言被新郎嚇一嚇，他說：「佢無啦啦塞咗封利是畀我，我話唔使搞呢啲嘢，推推拉拉咗一輪，佢話一定要收，啲賓客又喺度望住，搞到好鬼尷尬，哈哈！總之衷心祝福佢哋幸福快樂，快快趣趣生幾個小朋友啦！」