放寬擇偶條件高海寧不求辣味相投

藝人高海寧、何依婷及黃庭鋒等，昨日出席食肆開幕，自稱喜歡挑戰辣度的高海寧說：「鍾意辣同重香料食物。（唔怕對皮膚唔好？）食辣會出汗，加速血液循環兼排毒，皮膚都靚啲，你睇我就知啦！（辣妹一名喎？）哈哈！我真係好鍾意辣，記得喺日本食過碗史上最辣拉麵，我食完即刻胃痛同嘔添。（攞苦嚟辛？）人一世物一世乜嘢都試吓嘛。」

問到她揀男友是否也需要食得辣？她笑稱要是這樣只會更難找男友：「最好可以一齊食，但唔會逼佢，不過佢都唔好逼我食芫荽，我最怕，哈哈！」

何依婷留童年陰影

何依婷坦言對辣有童年陰影：「細個唔識分，有次姨丈買煎釀三寶畀我，話啲尖椒唔辣，點知就辣到爆，自此就唔敢食辣。」談到近況，她開心表示受惠於劇集《十月初五的月光》帶挈，近來多了出活動，亦有接拍廣告，現正拍攝另一新劇《法言人》。