被蔡潔踢爆2男同床 張振朗抽身同朱敏瀚分手

張振朗、姚子羚、蔡潔、朱敏瀚等昨午出席無綫劇《拳王》結局篇宣傳活動，並提早報佳音，而振朗又負責演繹劇集歌曲，不過「發台瘟」將主題曲《我是王》說成「拳王」、片尾曲《勝利在我面前》變作「勝利在我眼前」。較當年參加新秀，振朗歌藝明顯進步：「片尾曲嘅歌詞來自馬來西亞一位粉絲嘅創作，我尋晚凌晨兩點幾先收到，冇時間同隊Band夾，不過粉絲咁有心，我覺得要努力唱好佢。」

談到劇集內與朱敏瀚及蔡潔上演「三角戀」，有網民取2男角色名字海正藍及石子聰合併為「海枯石爛」，振朗笑說：「我哋為咗角色持續咗成年、每星期6日齊齊操肌，而且前後3年合作咗3套劇。大家一齊成長，但依家唔好見太多嘞，暫時嚟個逗號先。」

蔡潔於戲內被朱敏瀚苦苦追求，她卻鍾情振朗，更放下矜持大聲呼喊，向對方表白，她又笑指戲中兩男有多場「談心床戲」。問到現實中可會向心儀對象放膽示愛？蔡潔說：「鍾意一個人我都會好主動，但唔會用呢種方法。近排啲朋友見到我，都問我可唔可以再大嗌一次，呢個經歷都幾難得，都唔知仲會唔會有下次。」朱敏瀚則透露正努力轉變形象：「唔想睇起嚟咁細個，好努力咁曬燈變黑。（唔怕有副作用？ ）都驚㗎，不過做嘢真係冇辦法，而且自己貪靚呢！」