何依婷被屈錢 劉佩玥「剋夫」 羅天宇玩命邂逅

何依婷、羅天宇、米雪、石修及劉佩玥等前晚赴宴齊齊睇有份參演的《十月初五的月光》結局，惟男主角胡鴻鈞因工作在身而缺席。劇中何依婷學成歸來與「初哥哥」有情人終成眷屬；患上腦退化症的米雪最終能認出何依婷，及向由姚嘉妮飾演的細女「萬朱莎華」剖白；還有退出三角戀的羅天宇，邂逅劉佩玥開始新戀情，幕幕淚中有笑。

飯局由3位主角自掏腰包加設抽獎環節，何依婷踢爆被胡鴻鈞「屈錢」：「想屈我畀晒啲禮物錢，但好彩其他人幫口，話如果我攞兩萬，佢就要畀3倍，最後我哋3個人夾。」談及她打入「最佳女配角」與「飛躍進步女藝員」10強，問對哪個獎較有信心？她說：「一定要有信心，咩獎都冇所謂。」羅天宇第3度提名「飛躍進步」獎，進入10強的他雖得何依婷及劉佩玥力撐，他卻信心不大：「上年有齣《香港愛情故事》，自己緊張到瞓唔着，所以依家會保持平常心。」

至於被封為新一代「御用寡婦」的劉佩玥指事前要守住成為大結局彩蛋的秘密，笑說：「我連媽咪都冇講，雖然只係出少少，但係又有飯食，又有獎抽真係好開心。我成日喺啲劇整死老公，但係戲外就係福星，部劇或者會有第二季呢！」羅天宇聞言笑說：「咁我係咪喺第二季會死？」劉佩玥笑說：「到時唔係十月初五，係七月十四。」

劉佩玥亦是「女飛躍」的10強之一，她自問成績已達標：「今年個個角色都有回響，多咗人認識，我已經好開心、好滿足。」