娛美人：泊古天樂碼頭 林熙彤練大膽

外表甜美的林熙彤（Hazel），16歲時因愛影相而應徵做網店模特兒，最爆是當時她正箍牙，故打定輸數，怎料一擊即中，更憑「鋼牙妹」造型引起網民注意，並被經理人Kim發掘。問覺得為何古天樂會選中她？她笑說：「我仲未見過佢。（想一齊拍戲？）都想，拍戲可以試到其他角色，成世流流長淨係做自己會好悶。（演父女？）都好呀！父女互動仲多。」又讚父母靚仔靚女，自覺遺傳了他們的強大基因！

她亦有留意公司的師兄、師姐：「好似Mandy（譚旻萱），我有睇佢拍MIRROR成員Edan嘅MV，又靚又專業；而ANSONBEAN可以好自信咁唱歌跳舞，覺得佢好大膽，我對鏡頭好怕醜，好想做到佢哋咁勁。」又笑言若師兄不嫌她蠢，好想跟他學跳舞。

正修讀副學士平面設計課程的她，平日愛因應心情而配搭衣着。同時兼顧學業和工作，她慶幸選修的學科不用考試，但卻有海量功課，近月晚晚做到凌晨4、5點，朝早9點就返學。她自認性格執着，寧願少睡也要做好，又分享小竅門：「我會將所有嘢變得好玩，可能有時要做唔鍾意嘅Poster，我會揀自己鍾意嘅內容做。」