冇資格做視帝 胡鴻鈞屈何依婷 出2萬蚊抽獎

由胡鴻鈞、何依婷、羅天宇及鄺潔楹等主演的無綫劇《十月初五的月光》進入結局篇，台前幕後昨日雲集電視城，出席最後一次宣傳活動，場面熱鬧。胡鴻鈞受訪時「屈」何依婷畀錢抽獎：「我哋約咗星期五一齊食飯睇大結局，到時何依婷會攞2萬蚊出嚟抽獎，因為佢除咗呢套劇之外，之前仲有《星空下的仁醫》。（咁你攞幾多出嚟？）唱隻歌助興算啦！」

被「屈」的何依婷表示：「唔係我、你同羅天宇一齊夾咩？」胡鴻鈞說：「咁收視都有20點，所以我哋會買啲禮物抽獎，可能有現金，價值唔好講喇。（你兩個想唔想再合作？）梗係想，不過我暫時休息緊，播完《愛上我的衰神》後再冇存貨喺手，何依婷就拍緊另一套劇。」

對於《十》劇播完後，緊接推出《愛》劇，有指無綫為他鋪路做視帝，胡鴻鈞坦言：「唔關事，任何影視上嘅獎項，我都未有資格攞，依家只係儲經驗同學嘢。（有冇拉票？）完全唔使，不過會呼籲大家投票，投畀自己喜歡嘅演員。」

至於鄺潔楹於劇中經常欺負何依婷，她坦言靈感來自中學的欺凌事件：「喺美國讀書時，我係唯一一個亞洲人，有個白種女同學覺得我搶佢風頭，睇我唔順眼，甚至想出手打我，要保安出面調停，所以我用咗佢嚟做角色原型。（當時你好唔開心？）咁又唔會，身邊總有啲正義之士，不過我同嗰位女同學就點都做唔到朋友！」她又表示角色稍後慘遭毀容，視為一次挑戰：「本身我個角色都霸道兼脾氣差，被毀容後更變本加厲。化毀容妝好花時間，演戲時亦唔可以太大表情，驚化妝會甩，所以我都幾緊張。」