想要孝順仔姚子羚搵Bob介紹筍盤

無綫台慶劇《拳王》一眾藝員包括張振朗、姚子羚、許家傑等昨日為劇集宣傳，姚子羚被問及感情狀況時透露有追求者，但要先了解一下：「好多朋友會介紹男仔我識。（有冇搵Bob介紹？）有機會問吓，唔知佢手頭上仲有冇呢？」對於擇偶條件，她指最緊要三觀一致：「人大咗覺得責任心同孝順好重要，孝順嘅男仔唔會衰得去邊。」談到劇集收視，她說：「跨平台收視唔錯，好多朋友睇完話我今次演出好唔同。（有冇信心衝視后？）今屆有份提名嘅個個都做得好好，都希望自己好姊妹智雯攞到。（自己呢？）有獎固然開心，冇都會繼續努力嘅。」

張振朗瘦蜢蜢變大大隻

為劇集操得一身肌肉的張振朗，指劇中除打拳外，亦有挑戰玩滑翔傘：「第一次玩，仲要揸埋部機自拍，好難忘。（點睇收視？）順其自然，做盡晒，希望有唔同嘅嘢畀觀眾睇，以前我瘦蜢蜢，依家變大大隻。」許家傑亦表示同意：「大家睇到會嘩一聲，振朗一身真肌肉，我就減脂肪，『神劇』通常開播收視會比較低，相信之後會上升。」