試過爛桃花 情傷留陰影 Heidi等33歲真姻緣 叫有心人準備

前女團As One成員蘇皓兒（Chloe）昨日聯同Heidi、陳紫萱和李炘頤（Alina）為主演電影《假冒女團》舉行簽名會，現場所見，Chloe晒長腿加送甜美笑容，而Alina的低胸裝亦甚搶眼。

Heidi憶述以前經常與Super Girls搞簽名會，對於組員Jessica宣布佗B，她說：「一知道即刻傳短訊恭喜佢，之前冇見過佢唔知，不過都估到，佢平時包到實，可能唔想畀人知住。我都要加把勁，有好消息會同大家講，一公布就係結婚。」她解釋：「睇咗師傅話我33歲會定落嚟，會有真命天子、真姻緣，好期待，仲有幾年時間，聽完師傅咁講，唔敢公布拍拖，驚係爛桃花，真係結婚嗰個先公布。」她又表示現在不想浪費時間，會多些專注工作，笑說：「對我有興趣嘅男仔，我32歲就好追我喇！可能以前受過情傷，驚驚！」

同場的陳紫萱透露早前帶父母捧自己電影場，期間遇上演員王丹妮為《梅艷芳》謝票，陳紫萱膽粗粗送戲票給對方，她笑說：「嗰時我冇自我介紹，後尾聽番，原來佢以為我係公關送飛。」她透露中學的師弟妹都有約她睇戲，故不介意重複看了《假》片6次，並說：「每次都留意到唔同嘅嘢，感動位愈來愈多，留意到更多細節，每次都睇到眼濕濕。」