姚焯菲唔敢低V JW自嘲冇嘢睇

每年一度的慈善騷《歡樂滿東華2021》昨晚在將軍澳電視城舉行，JW與Chantel合唱打頭陣，當中JW的晚裝前後Deep V，相當性感；擔任司儀的戴祖儀亦唔執輸，谷出「小山丘」。平日穿泳衣都要外披T恤的JW，被問如此性感可有獲男友「批准」？她笑說：「佢冇話唔畀，T恤係我自己想加啫！條裙好Sparkling，好啱開場着，其實冇乜嘢睇到。」問Chantel敢不敢挑戰低V晚裝，她耍手擰頭說：「將來或者可以，但依家一定唔得！」

剛從內地返港的林子祥（阿Lam）帶領「聲夢學員」冼靖峰、張馳豪、林智樂及孫漢霖獻唱，他透露明年3月將於亞博舉行一場演唱會，又大談檢測之苦：「撩鼻都撩咗6次，喺香港撩冇咁痛，喺第二度撩到好入，上到眼咁滯！」早前「人氣王」姜濤在音樂會獻唱其金曲《分分鐘需要你》致敬，阿Lam說：「啲後生可以唱我哋老人家啲歌都好，我冇聽過，想快啲聽。（聲夢學員唱成點？）都OK，首歌冇轉key，都好高。」

昨晚有多個籌款環節，其中「拳王慈善擂台戰」上，張振朗孭住姚子羚行石春路，再由姚子羚打爆氣球，振朗痛到七情上面；而另一組則相反，由關嘉敏孭起謝東閔打氣球，玩到一仆一碌！另一環節上，鄺美雲炸年糕給總理享用，籌得240萬元善款，其中40萬元由她捐出，出錢又出力。

此外，最近紅爆網絡的陶大宇雖身在內地，仍拍片隔空支持，更會在「卡拉之星」環節唱歌，他笑問大家：「你哋準備好未？我嚟喇喎！」相當幽默！