MIRROR 6子開騷姜濤唱金曲嫌老土 Anson Lo自摸搶Fo

男團MIRROR中最具人氣的6位成員在音樂會中各自「騷Quali」，姜濤、Edan首唱新歌，而Anson Lo自彈自唱之餘還自摸下體，Jer和Ian大談女友，AK則騷肌；不過最出位的還是22歲的姜濤，獻唱7、80年代的經典金曲後，竟說從前「唔鍾意呢啲歌，因為覺得好老土」。

MIRROR半數成員包括姜濤、Jer、Edan、Anson Lo、Ian及AK舉行一連兩場會展騷，前晚首場吸引鄭欣宜、馮允謙、「折骨Ben」趙祥誠等睇騷，欣宜如見家長般自動和Anson Lo的父母打招呼及合照，場面搞笑，姜濤媽咪亦有捧乖仔場。

或提早25歲退休

AK騷麒麟臂兼唱快歌打頭陣，說要唱首關於地球的歌，當眾人期待是《倒轉地球》之際，他卻選唱《離開地球表面》；Anson Lo以白馬王子Look由台中升上，以鋼琴自彈自唱《不可愛教主》，再跟Edan合體「田牧CP」獻唱完，翻唱蔡依林的跳唱歌時多次自摸下體，令「神徒」瘋狂尖叫。

Edan和姜濤首唱新歌，之後姜濤再挑戰唱功，Medley《浪子心聲》、《分分鐘需要你》、《等》及《追》等金曲向前輩致敬，不過卻說：「啱啱出道嗰陣係唔鍾意呢啲歌，因為覺得好老土，但入咗行，覺得有呢個責任將廣東歌帶出去，畀年輕人聽要向前輩學習，將精神傳承落去。」

姜濤受訪時談及翻唱金曲有壓力，這些歌雖比他更年長，但不難投入，因曾上網了解歌曲的意思及歷史。談到他曾表示29歲就退休，他笑說：「順其自然啦！可能依家變25歲，哈哈！」

Edan好鍾意MC

Edan被問到有傳電台為造就他攞男新人金獎而打壓對手MC（張天賦），他說：「大家鍾意自己偶像先有情緒，最緊要音樂好聽，希望多啲人鍾意自己嘅作品，坦白講我都好鍾意MC。」早前和圈外女友Kelly鬧情變疑雲的Jer，指女友在場，但坦言工作太忙，未處理好關係，Ian就話和女友盧慧敏各有各忙，另一半未有睇騷。