自嘲唔夠何依婷好戲 羅天宇暗戀溝仔王 冇膽表白

劇中除了他與「文初」胡鴻鈞的兄弟情外，兩男還同時愛上「君好」何依婷，天宇透露讀書時也有類似經歷：「當年我冇表明講出嚟，只係默默地暗戀咗幾年，對方就不停換男朋友。（個女仔知嗎？）知！因為返學本來有條短啲嘅路，但專登搵條長嘅路，同另一個朋友一齊搭的士返學。（做咩唔表白？）當時冇勇氣、自卑，依家佢都結埋婚啦！」

談到在劇中與依婷有不少感情戲，天宇大讚對方喊功一流，於一場離別戲份，更自嘲技不如依婷：「場戲要我攬住依婷，我係要喊嘅，睇劇本時都覺得會好有感覺，睇一次喊一次，但到現場嗰時點逼自己都只係眼濕濕，反而依婷已經爆喊緊，當刻我即刻被比下去，好想做得好，所以有啲壓力，雖然最後拍咗幾Take，但唔係我睇劇本時候嘅感覺。」

另外，天宇與依婷昨午於大埔出席聖誕活動，並合唱電視劇主題曲《祝君好》，他表示因近日氣管敏感，擔心會影響表現，幸最終都能「勉強合格」。依婷則謙稱拍劇時全因有對方在場，才令她安心演得好，笑言不介意以螢幕情侶姿態搵真銀。