衛詩雅聖誕多人約 湯怡拒收起性感 慘遭凌虐

湯怡、衛詩雅及曾樂彤等昨日現身銅鑼灣的英皇戲院開幕活動，湯怡主演的驚慄電影《致命24小時》下月上映，她透露片中不乏被虐情節，老公麥秋成睇完預告後覺得不舒服及心痛她：「我叫佢入到戲院唔好喊，佢個人好感性，同我一樣咁易喊。（你喺電影入面好性感，佢會唔會介意？）佢明白係工作需要，佢話：『你當係着住泳衣咪得囉！』佢好開明，唔介意。」續言雖然已為人母，但不會因此收起性感：「我唔會框死自己，收工做媽咪，做演員就乜都試。（唔會有底線？）睇劇本，呢套戲係我入行以嚟尺度最大，都係好大突破。」

提到聖誕將至，湯怡表示今次是與BB度過的首個聖誕，買了聖誕卡送給寶貝女：「老公話買咗張卡畀個女，我差啲喊，冇諗過佢咁Sweet。老公寫過聖誕卡畀我，我反而好少寫，我都要着重多啲儀式感，唔可以咁懶。（會寫咩畀BB？）寫得簡單少少，等佢3、4歲就識睇，諗住每年都寫一張卡送畀佢。」

至於衛詩雅自嘲大頭蝦，試過在戲院遺下電話及手提電腦，幸好最終成功領回失物，但強調當中沒有私密照。她又指每次出席戲院揭幕禮都會回想起初戀：「因為我嘅初戀就係發生喺戲院。」問到聖誕有何活動？她揚言多人約：「梗係會應約，全部去晒！」而曾樂彤雖然佳節要開工，但已有人約慶祝，並坦言想早日脫單。