昔日東方摸PetPet：蔡嘉欣冤氣狗女 去廁所都跟
前港姐蔡嘉欣家中養了兩狗一貓，當中以14個月大的狗女Mochi最黐身，連她去「便便」也黐到實！童年是貓癡的她，家中養了4隻貓咪長達7年，即使現時與家姐從娘家搬出同居，也養了一隻貓咪增添生氣。一直沒想過養狗的她，直至年前到訪朋友家中，發現貴婦犬長相可愛又忠誠，即心郁郁做「狗奴」，惟走遍多間狗舖都不合心水，後來有朋友為愛犬配種，並送她一隻BB狗女Mochi，之後家姐又帶來另一狗仔波子，從此變成兩狗一貓的安樂窩！
男友獲寵幸
嘉欣笑指3隻毛孩各有性格，雖然偶然會玩打架及爭食，但冇試過打到損手爛腳，她說：「佢哋都算易養，Mochi最初會八卦同撩隻貓，貓貓當然唔鍾意，但慢慢接納咗，後來仲有啲享受被撩添！至於兩隻狗仔之間，Mochi恃住係家姐霸道啲，成日用Pat Pat推開細佬波子，搞到波子地位好卑微，所以周圍屙屎以示不滿，一路行一路屙。」不過嘉欣也樂於做「執金」阿四，而Mochi每晚都會睡在她床邊。
兩隻狗狗體型太細，不適合生育，所以早已進行絕育手術，嘉欣說：「家姐將來嫁會帶波子走，我養一隻已經夠，唔想分薄啲愛。同埋Mochi好黐身，連我去大便都黐住，好乖。最溫馨係每日起身都會見到佢，收工返屋企又會好興奮咁迎接，跟住周圍轉。（男友呷醋？）有同佢講依家最鍾意係狗狗，唔係佢囉！Mochi個個都跟，仲當男友隻手係雞髀咁舔，可能異性相吸，男友喺度Mochi就唔理我。」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
