被古仔小齊當沙包 林峯被輪毆 仲要跳埋樓！

古天樂昨日與寰亞集團主席林建岳、洪金寶、林峯、任賢齊、黃德斌等人，到屏山為新戲《九龍城寨．圍城》開鏡拜神。古仔透露新戲打得甘，連續打足5日，今次很多年輕演員特地為打戲訓練，大家都親身上陣：「除咗有啲高難度動作搵替身，我入面啲動作好似旋風咁快。（難到你？）OK啦！因為都有少少武打拍攝經驗。」電影亦特地搭建80年代的九龍城寨景，他開心地說：「入面全部啲雜誌、電視都係80年代，係我細細個睇嘅電視，幾懷舊。」

小齊則表示首次與林峯合作，大讚對方努力，為打戲不停操練，一星期操足5日。林峯預告今次會被人打到飛起：「畀小齊、古仔輪流打，基本上每個角色都會打我，今次有拳腳打、撞車、跳樓，飛天遁地。」又坦言事前訓練了個幾月，第一日訓練時更差些練到嘔。講到電影拍到農曆新年後，兩人未能與家人過年，林峯提起囡囡即冧爆謂惟有每日視像：「依家個女歲幾，掛住老婆又掛住小朋友。（個女咁耐冇見你唔認得你？）唔會，一見到我就叫爸爸，冧到幾辛苦都冇所謂。」

而洪金寶亦有打戲，問到可會吃力？他坦言：「有少少。（點打動你？）畀錢我咪得。」問到可有與近日捲入桃色風波的好友譚詠麟聯絡？他說：「少啲，因為我啱啱喺上海返嚟。（知道佢嘅新聞？）少少啦！」問到信不信？他愈講愈勞氣：「我唔知呀！網上好多嘢唔信得，好多人話我1949年出世，又用另外一個女人嘅相話係我前妻，又話我會老，咁唔通講嗰個人就唔會老咩？因為佢好快就會『釘』，所以咪唔會老。」

另外，譚詠麟早前有份參與的內地音樂節目《時光音樂會》如常播出他的片段，明顯未有受到傳聞所影響。事件擾攘多日，昨日他終於首度開腔，在社交平台發文表示：「時光音樂會是一個令人感覺舒適的音樂節目，每次拍攝都帶畀我們好多不一樣的回憶。」見他正專心地忙着為音樂會的Postcard簽名，忙得不可開交，心情沒有半點影響。