大懲罰唔嘢小 馮盈盈叫戴祖儀帶定底褲

馮盈盈、麥美恩及何廣沛等昨日在元朗大棠為主持無綫新節目《真係唔好笑》進行拜神儀式，嘉賓有吳若希、戴祖儀、黃庭鋒。盈盈指節目考驗眾人忍笑能力，要唔准笑去引觀眾發笑，她說：「忍笑好難，但因為有大嘅懲罰所以忍到，大懲罰嘅程度令到我哋要卸下偶像包袱，之前拍嘢試過一日化妝、落妝3次，節目真係好好笑，夜晚返屋企都仲笑緊，笑到瞓唔着、笑到內傷呀，哈哈。」

盈盈日前受訪指人工只有19,000元引起網民討論，她笑說：「其實我係講政府審計署公布嘅全港入息中位數，唔係講我自己，引起誤會唔好意思，我比呢個數高嘅，可以照顧到屋企人同埋自己啦，好滿足嘅。」

戴祖儀得盈盈提點有備而來，她說：「盈盈早幾日打畀我話節目大懲罰好犀利，叫我帶定底褲，我真係帶多咗一條，希望夠用！第一次拍節目有沖涼車，預咗我哋污糟邋遢。」

吳若希則指沒有準備，最緊要日落前收工，她笑說：「大懲罰交畀男士去頂，頭先玩遊戲，何廣沛不停被扑頭，都好擔心佢會腦震盪。」講到主持的《麻雀鬥室三缺一》播出後，觀眾覺得玩法不清晰及太多主持太嘈吵，她說：「節目時間再充裕啲會好啲嘅，因為打麻雀嘅過程好多剪走咗，對啲麻雀精嚟講係唔夠喉，之後再改進。」戴祖儀則不覺得太多主持，她笑說：「《真》咪仲多，有7個主持。」