擸走《AMA》3獎 BTS揚威美國 膺最高榮譽年度藝人

樂壇盛事《AMA》前日於洛杉磯舉行，BTS掃走年度藝人、最受歡迎流行組合，以及跟美國饒舌女歌手Megan Thee Stallion合唱的《Butter》奪歌曲獎，BTS隊長RM致詞時表示：「4年前，我哋喺《AMA》首次做電視直播表演《DNA》，我哋當時好興奮亦好緊張，自此就係一段好長又好奇妙嘅旅程，我哋永遠唔會當成功係必然。」BTS原定跟Megan合唱得獎歌，但女方以「突發私人事務」為由缺席，不過BTS與英國樂隊Coldplay首次現場合唱《My Universe》補數。而BTS又被美國女歌手Chloe Bailey「捕獲」，上載合照到社交網。

Taylor雖然爭年度藝人輸給BTS，但也奪得最受歡迎流行女歌手，以及憑《evermore》奪最受歡迎流行大碟。缺席的Megan奪最受歡迎Hip-Hop女歌手、憑《Good News》奪得最受歡迎Hip-Hop大碟，以及憑《Body》奪得最受歡迎熱播歌曲。

年僅18歲的美國女歌手Olivia Rodrigo膺年度新人，穿上藍色吊帶低胸珠片晚裝長裙行紅地氈，非常搶鏡！美國女歌手Becky G亦賣大包，上衣心口直落肚皮開3個窿，晒驕人身材。