新劇慰勞宴百感交集炎明熹以淚洗面 Chantel陪喊

「人氣王」炎明熹前日身體抱恙仍同日連踩兩場活動，繼日間腳軟爆喊後，晚上出席主演新劇慰勞宴時又突然感觸哭成淚人，獲無綫高層曾志偉及何麗全慰問，就連她都自嘲過了一天「流淚日」！

無綫新劇《青春本我》由一眾「聲夢」學員炎明熹（Gigi）、姚焯菲（Chantel）、詹天文（Windy）、冼靖峰（Archie）等初挑大樑，JW（王灝兒）、吳業坤、黎燕珊等合演。劇集前晚於酒樓舉行慰勞宴，無綫電視總經理（節目內容營運）曾志偉、星夢娛樂CEO何麗全及無綫高層樂易玲亦有現身，講到Gigi身體不適一事，志偉一臉驚訝兼擔憂，直言希望藝人有充足休息時間。講到Gigi是《叱咤》女新人獎的大熱，不過該頒獎禮由ViuTV轉播，志偉直言睇好她攞獎，並開綠燈讓她出席。

Archie獅子開大口

回家休息再到酒樓的Gigi回復狀態，席間大屏幕播出劇集花絮片時，她跟Chantel及Windy感動得頻頻拭淚兼互抱安慰。受訪時Chantel直言很擔心Gigi的身體狀況，甚至自薦整晚照顧好姊妹。

談到Gigi、Chantel睇花絮片不停狂喊，前者抵死自嘲是流淚日，更拋下金句「萬感交集在一心」，而後者則繼續邊講邊眼濕濕：「啱啱見番啲相，好掛住拍劇嗰陣嘅時光！」另外，Gigi早前於台慶抽中2萬5千元大利是，她坦言會與同樣中獎的潘靜文夾份請學員食飯，惟Archie笑言要食昂貴的Omakase，嚇得Gigi作狀轉身走人，十分爆笑。