與黃宗澤張繼聰 兄弟互毆 陳家樂被追斬狂跑 驚動警方

陳家樂、黃宗澤（Bosco）、張繼聰、 周勵淇及衛詩雅聯同英皇主席楊受成昨日現身英皇電影《紮職2》開鏡儀式。阿聰透露與Bosco及家樂在戲中飾演由細玩到大的好兄弟，由街頭小混混到加入社團後上位，戲中有不少打鬥場面，問到有否受傷？他說：「大傷就冇，但每日都有啲損傷，但我上一部戲嘅傷未好晒，做緊針灸。」他指3人早前在尖沙咀拍了一場被追斬戲，由於太逼真，驚動警車到場：「我哋3個畀十幾人追，導演叫我哋全力跑，由天黑跑到天光，跑咗12個鐘，跑完覺得個下盤散咗。」

Bosco坦言在沒有任何跑步裝備下狂奔，跑到筋疲力盡：「阿聰跑開馬拉松，我叫佢就一就我哋。」家樂稱該場口被途人拍下放在網上討論區，以為真的發生打鬥：「我見啲人將個過程寫晒出嚟，我睇吓啲相，佢哋講緊嗰個人咪係我自己。（你有冇留言解釋？）我費事留言，佢哋作得個故事咁好，唔好拆穿。」

阿聰謂稍後三兄弟之間都會互毆，揚言是男人暴力美學，不過他的打鬥造型就嚇親服裝部姐姐：「佢話做咗三十幾年都未見過有人身上咁多血，啲血多到我喺屋企沖咗幾次涼都沖唔走。」

至於衛詩雅指今次是第4度跟張繼聰飾演情侶或夫妻，笑言下次可能要化老妝扮老夫老妻。休息年多湊仔的周勵淇對新戲十分期待，問她會否不捨得兒子？她直言：「冇！但我出門口佢都有喊，要令佢慢慢適應。」