吼實台慶大獎譚俊彥趁旺執金

今晚無綫台慶有10両黃金作大獎，譚俊彥笑言曾在綵排時「中獎」，希望正式時再抽到他！而周嘉洛一心想與緋聞女友蘇韻姿分「金」同味，可惜慘食檸檬。

無綫藝人譚俊彥（Shaun）、周嘉洛、劉佩玥、蘇韻姿、JW、吳業坤等，昨晚在電視城為《萬千星輝賀台慶》進行序幕綵排，今晚逾150位藝員及50位歌手將分為藝員隊及歌星隊，爭奪總值55萬元理財存款及10両千足黃金。

最近落力宣傳劇集《換命真相》的Shaun曝光率超高，談及小生陳豪、王浩信、馬國明缺席，會否趁機為「視帝」拉票？他說：「都要做嘅！既然有份參與就做好佢，以前會諗『都未到我啦』！依家心態唔同咗，就算今年真係冇，都改咗以前唔夠主動嘅壞習慣。」問到人氣旺，會否希望贏得10両黃金？他笑說：「以前試過綵排時被抽中，希望今年綵排時抽唔中，到正式先到我啦！金喎！好似啲學費喺眼前飄過咁！」

蘇韻姿唔益嘉洛

曾傳緋聞的周嘉洛與蘇韻姿全程零芥蒂，不過2人近排少見，蘇韻姿表示看不慣嘉洛的新髮型，更詐型說：「約佢食飯，成日都度唔到期。」嘉洛則透露將重返《愛．回家之開心速遞》拍大堆頭戲。問2人可有信心奪得黃金大獎，嘉洛即對蘇韻姿說：「如果攞到一人一半。」怎料對方請食檸檬：「我淨係諗請食飯咋！」

而吳業坤、JW代表歌星隊出戰，JW嫌棄吳業坤，指近排拍劇集《青春本我》見得太多，更有感情線。問有否親熱戲，JW說：「梗係冇啦！連拖手都冇呀！（希望續集有？）希望續集換人啦！」吳業坤抵死說：「你忍埋我呢個月啦！不過我好鍾意見到你，因為你係唯一一個會畀反應我嘅人，見你好似見到家燕姐咁！」